FOLK.PERM.RU
Меню сайта
Статистика

Главная » Статьи » История

Пера и Зарань (на коми-пермяцком)
Пера и Зарань(коми) Ме вот учöтнам эшö кывлi... Быль ли, небыль... Важын ни эта вöлöм. Сэк и тöв пö абу вöлöм таланьын. Ыджыт Шондi абу и вешшывлöм эна местаэзiсь. Пыр вöлöма мича да гажа. Быдмöма сэк татöн басöк лапья вöр - Парма. Олöмась вöрас зверь-пöткапöлöс. Отир эшö абу на вöлöм. Уна ли, етша ли чулалас кад - Пармаыс чужтас зонöс. Шуасö сiйö Пераöн. Бытшöм да кодя быдмас хозяин - и вöрыслö, и муыслö. Керас сiя аслыс ньöв, лöсьöтас ёссез. Ветлöтö пö аслас му кузя, видзöтлö, медбы и пуэс быдмисö бура, медбы и зверь-пöткапöлöс олiс бытшöмика, медбы и чериыс уялiс сöдз ваэзын. Öтпыр Пераыс лэдзчас Кöсва дорö, аддзö: мышкыртчöма кымöрсянь сизим рöма Енöшка да юö васö. - Тэ мыля юан менам юись васö? - юалö Енöшкаыслiсь Пера. - Мун татiсь. - Ме эг тöд, что ваыс тэнат, - шуö Енöшка, - а ютöг ме ог вермы овны. Сет юны пöттöдз. - Сета, ежели тэ менö кайöтан кымöрас. Ме бы видзöта, мый сэтчин керсьö. - Пуксьы, - шуö Енöшка, - сюррезö вылö. Пера пуксяс сы сюррез вылö, мöтыд и лэбтас сiйö кымöрас. Сувтас кымöрас Пера, и оссяс сы одзын Енма. Кытчö оз видзöт, быдлаын городдэз да городдэз - дöс алмазiсь да чар изiсь керöмась. Быдлаын биэз сотчöны: ыджытöсь и учöтöсь, гöрдöсь, лöзöсь и вежöсь. А шöрас сотчö медыджыт би, Шондi-Би. Охота лоас Пераыслö босьтны кöть неыджыт би тор да лэдзчöтны сiйö му вылас. Локтас сiя Шондi-Биыс дынö да кватитас бы... Сэтчö кыдз гымыштас, кыдз вирдыштас - и чапкач Перасö ылö-ылö Би дынсяняс. Пондас усьны Пераыс тартарарыö. Но вот кутас кинкö сiйö, лэбтас и пуксьöтас мыйöкö небытö. Видзöтö Пераыс - аддзö: пукалö сiя кымöровöй подушкаэз вылын, золотöй додьын, а кыскö сiйö серебрянöй вöв. Бокас сыкöт пукалö басöкся-басöк нывка. Синнэс сылöн лöз кымöрись, рожабаннэс - асывся зарниись, юрсиыс - чистöй золотоись, а паськöмыс свиттялö, нельки синнэз янöтö. - Тэ кин сэтшöмыс? - юалö нывкаыслiсь Пера. - Ме Зарань, Шондiлöн ныв. Быд асылö ме сайма одзджык Шондiысся и быд рытö вода сысся сёрöнжык. Ме дозирайта, медбы Шондiыс некинöс эз сот. А тэ мыля павкин Шондi-Биас? - юалö сiя Пераыслiсь. - Ме мöдi лэдзчöтны сiйö му вылас, - шуö Пера. - А мыйлö сiя тэныт му вылас? - Медбы городдэз сэтшöмöсь жö гырисьöсь да басöкöсь быдмисö, кыдз Енмаас. - А кин пондас нiя городдэзын овны? - юалö Зарань. - Миян тэкöт челядьным. Эд ме тэныт, тыдалö, гленитчи, раз тэ менö дорйин, - шуö Пераыс. - О-о, смев тэ, зонка. Смев да удав, - шуö Зарань, - эшö некин эз на лысьт кайны татчö, а тэ вот кайин. Эшö некин эз на лысьт павкöтны Шондi-Бисö, а тэ павкöтiн. Дорйи бы ме кöть кинöс, но тэнö эшö и радейта. - Сэк лэдзчам мекöт му вылас, - шуö Пера. - Ме мыччала тэныт ассим богатствоэз: керöссэз да вöррез, юэз да тыэз, видззез да ыббез. И иньдöтас Зарань ассис серебрянöй вöвсö увлань, муыслань. Лэдзчасö нiя му вылö, и Пера пондас мыччавны Зараньыслö ассис богатствоэз: вылын мыссэз-керöссэз да гажа вöррез, сöстöм юэз да басöк тыэз, цветитан видззез да веж ыббез. Гленитчöмась нiя Зараньыслö, и согласитчас сiя кольччыны Пераыскöт му вылас. Сэк окалас Парма-Вöрлöн зоныс Шондiлiсь нывсö. Казялас этö кымöрсянь Шондiыс, лöгасяс Зараньыс вылö и пышшас эна местаэзiсь: ась пö кынмöны кöдзытсяняс. Му вылас сэк жö лоöма кöдзыт да пемыт, пондöмась пöльтны ойся тöввез, кынмöмась юэз да тыэз, лым столаэз тыртöмась быд пельöсок. Лёк тöвчик пондöма гöрдззыны ассис кузь бöж, каляннэз пондöмась уннявны-повзьöтчыны. Сэк Пера лэбтас Зараньсö киэз вылас да пыртас вöрö. И Парма-мамыс примитас нiйö ласкова и дзебас аслас лапъя да небыт уввез увтö. Сизим год сьöрна абу вовлöма талань Шондiыс, сизим год сьöрна олöмась Пера да Зарань вöр пытшкын. Сы коста Зарань быдтас ни Пераыслö сизим зонöс - вынася-вынаэзö да сизим нылöс - басöкся-басöккезö. Зоннэс пондасö вöравны ни, и ныввес - гортовисявны. Ветлöтас-ветлöтас кытöнкö Шондi и охота лоас сылö видзöтны, мый ни лоис нылыскöт. Локтас сiя талань бöр. Сэк жö лоас бöра шоныт да югыт. Пышшасö тöввез и каляннэз, дзебсисяс тöвчик. Сыласö юэз да тыэз, пондасö цветитны быдмассэз. Енöшка мышкыртчас Кöсва весьтö юны. Пондас корны Шондiыс Зараньсö, медбы кайис сiя бöр кымöрас, кытöн пыр шоныт да гажа, кытöн быдöс тырмö, мый бы эз ков. Зарань оз бы кай. - Меным, - шуö, - татöн бур. Сэк Шондi пондас грöзитчыны: - Ме бöра пышша татiсь, ась тi кынматö. Зарань и баитö: - Сизим год олiм - эг кынмö. Вöр шонтiс. - Сэк сота быдöннытö öтлаын вöрыскöт, - повзьöтлö Шондi. Повзяс Зарань и шуö Пераыслö: - Только кымöрас ме верма видзны сiйö, медбы эз сот. Колас кайны. Каям быдöнным. Пера и шуö: - Ме татöн чужи, быдми, татчö и кольчча. Торйöтасö сэк нiя челядьнысö кык торйöн - мукöдсö кольны му вылö, мукöдсö кайöтны кымöрö. Но лöгасяс сэк Парма-вöр: - Ме нiйö шонтi, вердi, а нiя пышшöны бы. Ась мунö Зараньыс öтнас, кысянь локтiс, а челядьыс ась кольччöны му вылö! И лöсьöтас сiя говк: öтöрын ыкöстан - мöдöрын кылö. Пондас Зарань кытсавны челядьсö, медбы кайöтны Енмаас: ыкöстас öтöрö - мöдöр кылö. Сiдз нiя и янсöтчасö: Зарань мунас лунлань, челядьыс - ойлань. Дыр горзас, корас челядьсö Зарань, но нiя озö кылö. Эта коста Шондiыс сыбурна пондас сотны ни, нельки ваэз косьмасö, муыс потласяс, быдмассэз кельдöтасö. Нем керны - Зарань каяс кымöрас öтнас, медбы не сетны Шондiыслö сотны челядьсö. Лишь коляс му вылас ассис серебрянöй вöв да золотöй додь, медбы кöр-нибудь кайисö челядьыс сы дынö Енмаас. Эта кадö Пераыс öктас ассис зоннэсö, сетас нылö ньöввез да кайöтас медвылын керöс вылö мыччавны Шондiсö. - Видзöтö, - шуö сiя нылö, - вон ыджытся-ыджыт би, Шондi-Би; сысянь быдöс бурыс: шоныт и югыт, сыснь городдэз быдмöны. Но сысянь жö и быдöс умöльыс: сiя сотö и сiя кынтö, сiя янсöтiс быдöннытö тiянöс и менö мамныткöт. Ме пондылi сыкöт вермасьны, но öтнам эг вермы. А öнi мийö унаöсь. Лэбтасö сэк сизимнан зоныс ньöв и лыясö веськыт Шондi-Биас. Öтдруг ныкöт лыяс Пера аслас медыджыт ньöлiсь. Зэгалас быдöс Шондi-Би, чеччöвтас сы бердiсь ыджыт би тор да киссяс бичиррезöн омöн му кузяс. Öзъясö Пармаын сэк биэз, ыджытöсь и учöтöсь, лöзöсь и вежöсь. И пондасö быдмыны городдэз, сэтшöмöсь жö гырисьöсь да басöкöсь, кыдз Енмаас. Нiя городдэзын важся каддэзсянь олö отир - Пералöн да Зараньлöн челядь. Шуöны нiйö пермяккезöн да зырянаöн. Кодя отир. И шоныт, и гажа эта странаын. Вылын мыссэз-керöссэз да гажа вöррез, сöстöм юэз да басöк тыэз, цветитан видззез да веж ыббез, а сiдзжö городдэз да посаддэз - ыджыт богатствоэзöн тырöма край. Шондi бы и öнi пышшö татiсь (быд годö сы коста тöввез овлöны), но оз вермы, раз ыджыт тор сылöн мусö шонтö. Сiя бы и сотö гожумнас, но Зарань оз сет. Сiя сё медодз чеччö асывнас и медбöръя водö рытнас - дозирайтö, медбы некинöс эз сот Шондiыс. Только быд гожумся асылö мусö да вöрсö вевттьö кыз сöстöм лысва. Этö Зарань одз асывнас, кöр эшö быдöнныс узьöны, горзö - гажтöм сылö челядьыстöг. Да и челядьыс сылöн частожык баитлöны, кыдз бы адззыны серебрянöй вöвсö золотöй додьнас да кайны Енмаас. Одзжык эз веритлö, а öнi веритöны ни тай, что кымöрас туйö кайнытö. Ме бы кайла жö сэтчин.

Источник: http://www.komi.com/folk/myth/65.htm

Источник: http://immrill.clan.su/publ/8-1-0-37

Категория: История | Добавил: Шаман (17.01.2008)
Просмотров: 1021 | Рейтинг: 5.0/1 |
Форма входа
Друзья сайта

ПараНормальное явление - передовой музыкальный проект!

Copyright FOLK.PERM.RU © 2007
Сайт управляется системой uCoz